ফিল’বাৰীৰ কাণ্ডৰ তীব্ৰ গৰিহণা কৰ্মচাৰী পৰিষদৰ

নগাঁৱৰ পৰা জয়ন্ত মুদৈ, ১৬ অক্টোবৰঃ তিনিচুকীয়াৰ ছিনিয়ৰ ছেকেণ্ডাৰী স্কুলৰ এগৰাকী শিক্ষয়িত্ৰীক ছাত্ৰ-ছাত্ৰীৰ সন্মুখত আঁঠু কাঢ়ি ক্ষমা খুজিবলৈ একাংশ ছাত্ৰনেতাই বাধ্য কৰোৱা ঘটনাক তীব্ৰ ভাষাৰে গৰিহণা দিছে সদৌ অসম কৰ্মচাৰী পৰিষদে ৷ বাতৰি কাকতলৈ প্ৰেৰণ কৰা এক বিবৃতিত পৰিষদৰ ভাৰপ্ৰাপ্ত সভাপতি দ্বিপেন শৰ্মা আৰু ভাৰপ্ৰাপ্ত সম্পাদক প্ৰধান শ্যামন্ত দাসে গভীৰ উদ্বেগেৰে কয় যে-শেহতীয়াভাবে ছাত্ৰ-ছাত্ৰীৰ নামভৰ্তিক লৈ শিক্ষা বিভাগে জাৰি কৰা কিছু নিৰ্দ্দেশনাই স্থানীয়ভাবে বিদ্যালয়সমূহত অস্বস্তিকৰ পৰিবেশৰ সৃষ্টি কৰিছে ৷ যাৰ পৰিণাম এতিয়া ভোগ কৰিবলগীয়া হ’ল এগৰাকী শিক্ষয়িত্ৰীয়ে ৷ আচলতে, বিদ্যালয়ৰ চাৰিবেৰৰ বিষয় এটা বিদ্যালয়ৰ মজিয়াত সমাধান নকৰি একাংশ ছাত্ৰ নামধাৰীয়ে বিষয়টো বাহিৰলৈ উলিয়াই নিলে আৰু সেইসকল ছাত্ৰৰ জিঘাংসাৰ বলি হ’বলগা হ’ল শিক্ষয়িত্ৰীগৰাকী ৷ গতিকে পৰিষদে ইয়াৰ উচিৎ তদন্তৰ দাবী জনোৱাৰ লগতে দোষীক উপযুক্ত শাস্তি প্ৰদানৰ বাবে ৰাজ্য চৰকাৰৰ প্ৰতি আহ্বান জনাইছে ৷