বটদ্ৰৱা সমষ্টিত বিদ্যালয়ৰ গৃহ নির্মাণৰ নামত বিয়াগোম কেলেংকাৰী≈≈নাম সাঙুৰ খাইছে প্ৰাক্তন বিধায়িকা আঙুৰলতা ডেকাৰ লগতে স্বামী আকাশদ্বীপ ডেকাৰ
নগাঁৱৰ পৰা জয়ন্ত মুদৈ, ১১ আগষ্টঃ বিগত নিৰ্বাচনত পৰাজিত হৈয়ো পৰাজয় স্বীকাৰ কৰিব নোখোজে বটদ্ৰৱা সমষ্টিৰ প্ৰাক্তন বিধায়িকা আঙুৰলতা ডেকাই । কিন্তু এইবাৰ প্ৰাক্তন বিধায়িকাগৰাকীৰ নাম সাঙুৰ খাইছে বিয়াগোম কেলেংকাৰীত । অকল আঙুৰলতা ডেকাৰেই নহয় নাম সাঙুৰ খাইছে স্বামী আকাশদ্বীপ ডেকাৰো । আচলতে, বটদ্ৰৱা সমষ্টিৰ বিদ্যালয় সমূহৰ অতিৰিক্ত শ্ৰেণীকোঠা আৰু শৌচাগাৰ নিৰ্মাণৰ নামত সংঘটিত হৈছে এই বিয়াগোম কেলেংকাৰী । উল্লেখ্য, ২০১৮-২০১৯ বৰ্ষৰ আবন্টিত এম এছ ডি পি(MSDP) আচঁনিৰ অধীনত বটদ্ৰৱা সমষ্টিৰ বহুকেইখন বিদ্যালয়ৰ গৃহ নির্মাণৰ নামত আবন্টিত হৈছিল প্ৰায় দুই কোটি টকা । কিন্তু বিদ্যালয়ৰসমূহৰ প্ৰধান শিক্ষক আৰু পৰিচালনা সমিতিক অজ্ঞাতে ৰাখি কাম নকৰাকৈয়ে ধন আত্মসাৎ কৰাৰ চাঞ্চল্যকৰ অভিযোগ এতিয়া সমষ্টিবাসীৰ মুখে মুখে । জানিব পৰা মতে, বিদ্যালয়সমূহৰ গৃহ নির্মাণৰ অধিকাংশ নিৰ্মাণ সমিতিৰ সদস্য সচিব হৈছে প্ৰাক্তন বিধায়িকা গৰাকীৰ স্বামী আকাশদ্বীপ ডেকা । ইয়াৰ বিপৰীতে আন কেইবাখনো বিদ্যালয়ৰ গৃহ নিৰ্মাণ সমিতিত আকৌ আছে আঙুৰলতা ডেকাৰ অতি ঘনিষ্ঠ কেইবাজনো বিজেপিৰ নেতা আৰু পালিনেতা । ইফালে, আশ্চৰ্যজনক কথাটো উত্থাপিত এনে দুৰ্নীতিৰ বিষয়ে জানিব বিচৰাত কেইবাগৰাকী প্ৰধান শিক্ষকে তেওঁলোকৰ বিদ্যালয়ৰ গৃহ নিৰ্মাণৰ বাবদ কেতিয়া কেনেকৈ ধন আবন্টিত হ’ল সেই সম্পৰ্কত অজ্ঞতাহে প্ৰকাশ কৰে । সেয়ে প্ৰশ্ন হৈছে কি কাৰণত গৃহ নিৰ্মাণৰ সন্দৰ্ভত বিদ্যালয়ৰ কৰ্তৃপক্ষক অন্ধকাৰত ৰখা হ'ল ৷ সেয়া আজিৰ তাৰিখত এক ৰহস্যজনক বিষয় হিচাপে চিহ্নিত হৈছে । কাজেই, মুখ্যমন্ত্ৰী ড° হিমন্ত বিশ্ব শৰ্মাই সততে শূন্য সহনশীলতাৰ কথা কৈ থকাৰ সময়ত তেওঁৰেই অতি ঘনিষ্ঠ প্ৰাক্তন বিধায়িকা গৰাকীৰ বিৰুদ্ধে উত্থাপিত এনে অভিযোগক লৈ এতিয়া সমষ্টিৰ সৰ্বত্ৰে ব্যাপক চৰ্চা চলা পৰিলক্ষিত হৈছে । সেয়ে কাম নকৰাকৈ এনেদৰে চৰকাৰী ধন আত্মসাৎ কৰা আঙুৰলতা ডেকা আৰু তেওঁৰ স্বামীৰ লগতে তেওঁলোকৰ কেইবাজনো সাংগোপাংগোৰ বিৰুদ্ধে কি ব্যবস্থা গ্ৰহণ কৰে সেয়া পৰৱৰ্তী সময়ত লক্ষণীয় হব ।
==================
Comments
Post a Comment