বেবেজীয়াত পথ দুৰ্ঘটনাত অন্তঃসত্বা মহিলাৰ মৃত্যু

নগাঁৱৰ পৰা জয়ন্ত মুদৈ, ২৩ জুনঃ নগাঁও জিলাৰ বেবেজীয়া চাৰিআলিৰ সমীপৰ জুৰীয়া নামঘৰৰ সন্মুখত ৩৭নং ৰাষ্ট্ৰীয় ঘাইপথত আজি কাহিলি পুৱা সংঘটিত হোৱা এক শোকাৱহ পথ দুৰ্ঘটনাত এগৰাকী ২৮ বছৰীয়া অন্তঃসত্ত্বা মহিলাৰ মৃত্যু হয় ৷ জানিব পৰা মতে, স্থানীয় ক্ষিৰ শইকীয়াৰ বিবাহিত কন্যা অলকা শইকীয়া(বৰা)ই পু্ৱা ৪ মান বজাত প্ৰাতঃভ্ৰমনৰ বাবে ঘৰৰ পৰা সন্মুখৰ ৰাষ্ট্ৰীয় ঘাইপথলৈ   ওলাই অহাৰ সময়তে গুৱাহাটীৰ পৰা নগাঁও অভিমুখী এখন মৃত্যুঞ্জয়-১০৮ বাহনৰ আগত পৰি যোৱাৰ ফলত তেওঁ গুৰুতৰ ভাৱে আহত হয় ৷ আহত মহিলাগৰাকীক ততাতৈয়াকৈ বেবেজীয়া আৰক্ষীৰ সহায়ত পুনৰ মৃত্যুঞ্জয়-১০৮ বাহনেৰে  চিকিৎসালয়লৈ নিয়া হয় যদিও চিকিৎসকে উন্নত চিকিৎসাৰ বাবে গুৱাহাটীলৈ প্ৰেৰণ কৰে ৷ পাছত গুৱাহাটীলৈ নিয়া অৱস্থাতে তেওঁ আদবাটতে শেষ নিশ্বাস ত্যাগ কৰে ৷ এগৰাকী ৪ বছৰীয়া কন্যা সন্তানৰ মাতৃ অলকা শইকীয়া দ্বিতীয় বাৰৰ বাবে গৰ্ভাৱতী হৈছিল আৰু  মৃত্যু সময়ত চাৰিমহীয়া অন্তঃসত্ত্বা আছিল ৷ জানিব পৰা মতে, তেওঁৰ স্বামীৰ ঘৰ বেবেজীয়াৰ নিকটবৰ্ত্তী ২নং গেদাৰবড়ি গাঁৱত আৰু মাত্ৰ ছয়দিনৰ আগতে তেওঁ  স্বামীগৃহৰ পৰা পিতৃগৃহলৈ আহিছিল ৷ মৃত মহিলাগৰাকীৰ স্বামী ত্ৰিদিপ বৰা  সামৰিক বাহিনীত কৰ্মৰত আৰু বৰ্তমান ঋাৰখণ্ডত আছে বুলি জানিব পৰা গৈছে ৷ মহিলাগৰাকীৰ একে কৰুণ মৃত্যুত অঞ্চলজুৰি গভীৰ শোকৰ ছাঁ পৰিছে ৷

===================