বাৰঘৰীয়া বাৰগোপাল থানৰ প্ৰণামীৰ ধন লৈ উধাও চোৰ

*নলবাৰীৰ ঐতিহ্যমণ্ডিত বাৰঘৰীয়া বাৰগোপাল থানত চুৰি কাৰ্য*

*ৰূপক বৈশ্য, ফাৰ্ষ্ট নিউজ ৰিপোৰ্ট, নলবাৰী, ১৪ আগষ্ট*

যোৱাকালি নিশা কোনো অজ্ঞাতকাৰী দূস্কৃতিকাৰীয়ে নলবাৰী জিলাৰ ঘগ্ৰাপাৰ ৰাজহ চক্ৰৰ অন্তৰ্গত ঘোৱাৰকুঁছি গাঁৱত অৱস্থিত ঐতিহ্যমণ্ডিত বাৰঘৰীয়া বাৰগোপাল থানৰ মূল প্ৰণামী বাকচ ভাঙি টকা পইচাকে আদি কৰি সোন-ৰূপৰ আাঙঠি চোৰে চুৰি কৰি লৈ যায় । আজি পুৱা দেউৰী প্ৰতাপ দাসে মন্দিৰত বন্তি জ্বলাবলৈ গৈ প্ৰণামীৰ বাকচ ভাঙি থকাতো প্ৰত্যক্ষ কৰে । লগে লগে দেউৰী দাসে উক্ত ঘটনাটো মন্দিৰ পৰিচালনা সমিতিক অৱগত কৰে । পৰিচালনা সমিতিৰ অনুৰোধমৰ্মে ঘগ্ৰাপাৰ থানাৰ ভাৰপ্ৰাপ্ত আৰক্ষী বিষয়া ভাস্কৰমল্ল পাটোৱাৰী  ঘটনাস্থলীত উপস্থিত হৈ পৰিস্থিতিৰ বুজ লয় । স্থানীয় ৰাইজে চুৰি কাৰ্যৰ লগত জড়িত আটাইকে কৰায়ত্ব কৰি উচিত শাস্তি প্ৰদান কৰিবলৈ আৰক্ষী বিষয়াগৰাকীক আহ্বান জনায় । উল্লেখ্য যে বিগত সময়ত উক্ত থানত চুৰি কাৰ্য সংঘটিত হৈছিল যদিও চোৰে নিজেই আহি থানত শৰণাপন্ন হ'বলৈ বাধ্য হোৱা খবৰো সমাজত বিদ্যমান ।

*প্ৰেৰকঃ ৰূপক বৈশ্য, নলবাৰী*