বঙাইগাঁও জিলাত এদিনতে ৮৬ জন ব্যক্তিৰ দেহত ধৰা পৰিল ক'ভিড - ১৯ প'জিটিভ
বঙাইগাঁও জিলাত এদিনতে ৮৬ জন ব্যক্তিৰ দেহত ধৰা পৰিল ক'ভিড - ১৯ প'জিটিভ
মুঠ সক্ৰিয় ৰোগীৰ সংখ্যা ৫৬২ জনলৈ বৃদ্ধি
বঙাইগাঁওঃ ৪ মেঃ বঙাইগাঁও জিলাৰ ঝাউবাৰীৰ ৰম্ভা ৰায় ( ৫০ ) নামৰ মহিলা এগৰাকীৰ আজি পুৱা গুৱাহাটীৰ এখন ব্যক্তিগত চিকিৎসালয়ত ক'ভিডৰ লগতে আন জটিলতাত ভুগি চিকিৎসাধীন অৱস্থাত মৃত্যু হয় ৷ জিলা প্ৰশাসনে প্ৰকাশ কৰা তথ্য মতে ৰম্ভা ৰায়ক শ্বাস - প্ৰশ্বাসজনিত সমস্যাত ভোগাত পৰিয়ালৰ লোকে প্ৰথমে চিৰাং জিলাৰ চাপাগুৰীস্থিত চেণ্ট আগষ্টাইন হাস্পতালত ভৰ্তি কৰিছিল ৷ মহিলাগৰাকী মধুমেহ ৰোগতো ভুগি আছিল ৷ পিছত উন্নত চিকিৎসাৰ বাবে মহিলাগৰাকীক বঙাইগাঁৱৰ ল'ৱাৰ আসাম হাস্পতালত ভৰ্তি কৰা হয় ৷ কিন্তু এদিন পিছতে পুনৰ গুৱাহাটীলৈ প্ৰেৰণ কৰা হয় ৷ গুৱাহাটীৰ জিএনআৰচি হাস্পতালত ভৰ্তি কৰা মহিলাগৰাকীৰ ক'ভিডত আক্ৰান্ত হোৱাতো পৰীক্ষাত ধৰা পৰিছিল ৷ পিছত মঙলবাৰে পুৱা ৬ঃ ২০ বজাত চিকিৎসাধীন অৱস্থাতে ৰম্ভা ৰায়ৰ মৃত্যু হয় ৷
ইপিনে বঙাইগাঁও জিলাত ক'ৰোনাত আক্ৰান্ত সক্ৰিয় ৰোগীৰ সংখ্যা মঙলবাৰে ৫৬২ জনলৈ বৃদ্ধি পাইছে ৷ জিলাখনত মঙলবাৰৰ দিনটোত নতুনকৈ ৮৬ জন ব্যক্তি ক'ভিডত আক্ৰন্ত হোৱাটো ধৰা পৰিছে ৷ ইয়াকে ধৰি জিলাখনত বৰ্তমান মুঠ সক্ৰিয় ক'ভিড ৰোগীৰ সংখ্যা ৫৬২ জনলৈ বৃদ্ধি পালে ৷ সোমবাৰে জিলাখনৰ ৬৪ জনকৈ ব্যক্তি ক'ভিডত আক্ৰান্ত হোৱাটো ধৰা পৰিছিল ৷ আনহাতে মঙলবাৰৰ দিনটোত জিলাখনৰ ৩৯ জনকৈ ৰোগী সুস্থ হৈ উঠিছে ৷ জিলাখনত মঙলবাৰে ৰেপিড এণ্টিজেণ্ট টেষ্ট আৰু আৰ টি পি চি আৰ টেষ্টকে ধৰি মুঠ ২,২৩৭ জনক ক'ভিড টেষ্ট কৰা হয় ৷ ইপিনে জিলাখনত যোৱা ১ মাৰ্চৰ পৰা মঙলবাৰলৈ মুঠ ক'ভিডত আক্ৰান্তৰ সংখ্যা ৮৭৫ জন হৈছে ৷
প্ৰণৱ কুমাৰ ডেকা
বঙাইগাঁও
Comments
Post a Comment