নগাঁৱৰ ৰাঙলুত চুৰি গৰুসহ ধৃত গভাইত চোৰ

নগাঁৱৰ পৰা জয়ন্ত মুদৈ, ২৯ জুলাইঃ ৰাজ্যৰ বিভিন্ন প্ৰান্তৰ দৰে নগাঁও জিলাতো সঘনে সংঘটিত হৈ আহিছে গৰু চুৰি কাণ্ড । আৰক্ষীৰ নিৰাপত্তা ব্যৱস্থাক ভেঙুচালি কৰি সবল নেটৱৰ্ক গঠনেৰে এক দুষ্ট চক্ৰই অব্যাহত ৰাখিছে এই চুৰি কাণ্ড ৷ সঘনে সংঘটিত হৈ থকা এনে চুৰিকাণ্ডই ৰাইজক আতংকিত কৰি ৰখাৰ সময়তে মঙলবাৰে নিশা জিলাখনৰ ৰাঙলুত আটক কৰা হয় এটা গৰু চোৰক ৷ এটা চুৰি গৰুসহ চোৰটোক ৰাইজে হাতে লোতে কৰায়ত্ত কৰি আৰক্ষীক গতাই দিয়ে । জানিব পৰা মতে, নিশা ৰাঙলুৰ গড়হাকি গাওঁৰ ৰাইজৰ লগতে টুবুকিগ্ৰাণ্ট গাঁওৰক্ষী বাহিনীৰ হাতত আটক হয় মকিবুৰ ৰহমান নামৰ এই গভাইত চোৰটো ৷ অৱশ্যে দিলোৱাৰ হুছেইন নামৰ আন এটা চোৰ কৌশলেৰে পলাই যাবলৈ সক্ষম হয় । দুইটা চোৰে মিলি ৰাঙলুৰ টুবুকিগ্ৰান্টৰ এঘৰ মানুহৰ পৰা তিনিদিন আগতে এটা গৰু চোৰ কৰিছিল ৷ পলায়ণ কৰা দিলোৱাৰ হুছেইন নামৰ চোৰটো পূৰ্বেও কেইবাটাও গৰু চুৰি ঘটনাত অভিযুক্ত বুলি জানিব পৰা গৈছে।