কৰ’নাৰ বিৰুদ্ধে হোৱা যুজঁখনত আমি জয়ী হ’বই লাগিব-তাৰ সমান্তৰালকৈ পথাৰ আৰু বজাৰ আমি দখল কৰাৰ পণ ল’ব লাগিব-পদ্ম হাজৰিকা

কৰ’নাৰ বিৰুদ্ধে হোৱা যুজঁখনত আমি জয়ী হ’বই লাগিব-তাৰ সমান্তৰালকৈ পথাৰ আৰু বজাৰ আমি দখল কৰাৰ পণ ল’ব লাগিব-পদ্ম হাজৰিকা৷

#নিজ গৃহলৈ যোৱাৰ অনুমতি ১৮ গৰাকী যুৱকক৷ 

ফাৰ্ষ্ট নিউজ,জামুগুৰিহাট,৩১ মে' : দেশৰ জটিল সময়ত বহি:ৰাজ্যৰপৰা উভতি আহি পোৱা ক্ষণটোত তোমালোকৰ চকুত দেখা পোৱা সেই চিন্তাৰ বিপৰীতে আজি এই মুহুৰ্তত মই তোমালোকৰ মুখত হাঁহি আৰু চকুত আশাৰ বাৰ্তা দেখা পাইছো৷মহামাৰী সদৃশ অদৃশ্য কৰ’নাৰ বিৰুদ্ধে হোৱা এই যুঁজখনত আমি জয়ী হ’বই লাগিব৷তাৰ সমান্তৰালকৈ আমি এতিয়াৰপৰাই পথাৰ আৰু বজাৰ দখল কৰাৰ পণ ল’বও লাগিব৷তেতিয়াহে আমি অৰ্থনৈতিকভাৱেও স্বাৱলম্বী হোৱাৰ লগতে দেশ তথা জাতিৰ হকে কাম কৰিব পাৰিম৷এই মন্তব্য চতিয়া সমষ্টিৰ বিধায়ক পদ্ম হাজৰিকাৰ৷কালি বিয়লি জামুগুৰি উচ্চতৰ মাধ্যমিক বিদ্যালয়ত থকা কোৱাৰেন্টাইন চেন্টাৰৰপৰা ১৮ গৰাকী যুৱকক স্বাস্থ্যবিভাগে নিজ গৃহলৈ যোৱাৰ অনুমতি দিয়া এক কাৰ্য্যসুচীত উপস্থিত থাকি যুৱকসকলক উদ্দেশ্যি এইদৰে কয় বিধায়ক পদ্ম হাজৰিকাই৷বিধায়ক গৰাকীৰ প্ৰচেষ্টাত তাৎক্ষণিকভাৱে তৈয়াৰ কৰি উলিওৱা সমষ্টিৰ ৫টা কোৱাৰেন্টাইন চেন্টাৰৰ ভিতৰত জামুগুৰি উচ্চতৰ মাধ্যমিক বিদ্যালয়ৰ কোৱাৰেন্টাইন চেন্টাৰটোও অন্যতম৷এই কোৱাৰেন্টাইন চেন্টাৰটোত বহি:ৰাজ্যৰপৰা অহা ৭৯ গৰাকী যুৱক কোৱাৰেন্টাইন হৈ আছিল যদিও কালি ১৮ গৰাকীৰ ১৪ দিনৰ কোৱাৰেন্টাইনৰ সময় শেষ হোৱাত তেঁওলোকক স্বাস্থ্যবিভাগে নিজ গৃহলৈ যোৱাৰ অনুমতি প্ৰদান কৰে৷ইয়াৰ লগে লগে চেন্টাৰটোত বৰ্তমান ৬১ গৰাকী যুৱক কোৱাৰেন্টাইন হৈ আছে৷শোণিতপুৰ জিলাৰ অতিৰিক্ত উপায়ুক্ত লীজা তালুকদাৰ,নদুৱাৰ ৰাজহ চক্ৰ বিষয়া আকাশদ্বীপ কাকতী,মহকুমা ও স্বাস্থ্য বিষয়া ডা° ৰূপক বৰুৱা,জামুগুৰি আৰক্ষী চকীৰ ভাৰপ্ৰাপ্ত বিষয়া মানিক বৰমুদৈ,স্বাস্থ্যকৰ্মীকে ধৰি বিভাগীয় লোকসকল উপস্থিত থকা অনুষ্ঠানটোত নিজ গৃহলৈ যোৱাৰ অনুমতি লাভ কৰা প্ৰতিগৰাকী যুৱকক পুণৰ ১৪ দিনৰ বাবে অত্যাৱশ্যকীয় খাদ্যসামগ্ৰীভৰ্তি টোপোলা পূৰ্ৱৰদৰেই যোগান ধৰে বিধায়ক হাজৰিকাই৷উল্লেখ্য যে যোৱা ২৮ মে’ৰ দিনাও জামুগুৰি বাৰেচহৰীয়া সাংস্কৃতিক ভৱণৰ কোৱাৰেন্টাইন চেন্টাৰৰপৰা ৩২ গৰাকী যুৱকক ১৪ দিনৰ কোৱাৰেন্টাইন সমাপ্ত হোৱাত নিজ গৃহলৈ যোৱাৰ অনুমতি দিছিল স্বাস্থ্যবিভাগে৷প্ৰণিধানযোগ্য যে বৰ্তমান জামুগুৰি উচ্চতৰ মাধ্যমিক বিদ্যালয়ৰ কোৱাৰেন্টাইন চেন্টাৰত ৬১ গৰাকী আৰু বাৰেচহৰীয়া সাংস্কৃতিক ভৱণ কোৱাৰেন্টাইন চেন্টাৰত ৪২ গৰাকী লোক কোৱাৰেন্টাইনত আছে৷জোন বৰা,জামুগুৰিহাট।